Эрзянь Мастор/2008/08/Дригань Толай - Осипов А.Г. - 2007 иень А.П.Рябовонь лемсэ казнень лауреат
| Статья на сайте газеты: № 280, 25.04.2008, Дригань Толай-Осипов А.Г. - 2007 иень А.П.Рябовонь лемсэ казнень лауреат |
| Дригань Толай — Осипов А.Г. — 2007 иень А.П.Рябовонь лемсэ казнень лауреат |
Чачь Дригань Толай (Осипов Анатолий Григорьевич) 1948 иень чадыковонь 8 чистэ Киргизстансо.
1963 ие. Прядызе Самара ёнксонь Похвистень буень 8-классонь эрзянь Олежвелень школанть, а 1966 иестэ — теке ёнксонь Подбелень педагогикань училищанть. Теде мейле важодсь тонавтыцякс ветькень ды эсензэ велень школасо. Седе тов ульнесь геологокс Памир пандтнэнь ютксо, Магадансо, Охотонь буень Хаканджасо, вешнесть сырне. 15 иень перть ламо таркава топавтсь артыцянь–художникень тевть. Свал, косо илязо эря, ловнось «Эрзянь правда газетанть ды «Сятко» журналонть. Шкань ютазь сюлмавсь «Эрзянь Мастор» газетанть ды «Чилисема» журналонть марто. 10 иеть уш сёрмады ёвтнемат, статьят, стихть эрзянь кельсэ. Спортсмен. «ЭМ»-нь ловныцянзо парсте содасызь Дригань Толаень седейс пачкодиця, виевдеяк виев публицистикань статьянзо. Эйсэст сюпавдояк сюпав ды пшти эрзянь ды рузонь кель, покш смусть, превей арсемат, видечинь кирдий ёнкс. Авторост парсте содасынзе Эрзянь Масторонь пек паро ды аволь паро тевтнень. Зярыяксть сакшнось Саранов ды Лукояновав эрьва кодамо илань ютавтомо.
Арсетяно теть, мельвановикс Толай, шумбрачи ды изнявкст эрзянь келень идемань Ине-валдо тевсэнть.
|
RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal. |