შუმილ მიქამგარია
Jump to navigation
Jump to search
გერგებაში დალიას
მესქილადირ ყუბერეფ,
ოფუტე დო ფანიას
ებირაფილ ყებურეფ.
ბჟა მიშახე ნანიას
გოჭიფელა ჭურიემს,
ბეძღუნიას გიშირშინ
ქრავაშ ბია -უშქურეფ.
გართუ ბებიშ ჩერიას
განჩეფი დო მერთელეფ:
,,ვაუჭიშედა, ფუჩხოლიაშ
შურ მეუღუ კუმურეფს.
გოდოგანიშ ფალიას
ვასხარსხალა ჭიჭიკეფ
ითირანა, ფარიას
მატყობანა ტაცალეთ.
საონჯღორო უციკანა -
იძიცანა ოსურეფ,
ოდო იში ნაყარია
ქიფაფუანს მონტყორეფს.
მათ ქუვორექ ბოშილია,
ათმოშუშუ ოშნერეფ,
მუშო მოკო ფუჩხოლია,
გურსუ ფუნსუ ლამურეფ...
კაჭიჭამი ატარიას
გაღანჩალნა მოშელეფ,
შუმილ მიქამგარიას
უფიფანსუ ოშმეშეფ.