Al sur Flamini Gallio del Pozz
Jump to navigation
Jump to search
Ironem Biragh (1691-1773)
Al sur Flamini Gallio del Pozz
Preghi el sur don Flamini a perdonamm
se vegni a desturball con sti pocch rimm,
ma quand gh'hoo di travaj mi vuj sfogamm
coi parent, coi amis, e lu l'è el primm.
El se regordarà quand quella sciora
la m'ha riduu adree tant domà perchè
sul cors de la Fontana, e giust in l'ora
che passa pussee gent la me vedè.
Quell rid m'è rincressuu: ma el mè dolor
l'è staa che tanc che se trovaven lì
per compiasè a la sciora han riduu anch lor,
dandegh a lee reson, e tort a mì.
Hin già passaa vott mes, e fors de pu,
pur anmò in del mè cœur la rabbia senti:
ghe pensi quand voo in lecc, quand levi su;
e appenna sont quiett quand m'indormenti.
[...]