Al vol
Jump to navigation
Jump to search
Ferdinando Fontana (1850-1901)
Al vol
El numer Des, ch'el sta in sul Malcanton,
el carèga alla vunna on forestée,
che el salta dent con dò valis adrée,
disend in pressa: "Molla!... Alla stazion!"
El lègn el va; ma, proppi sul canton
de via Manzoni, el trœuva on bulardée
d'ogni sort de veicoj de pianton,
e al Des ghe tocca se staggh li dedrée.
La causa l'è on tramvài ch'è adrée a passà;
e el forestée el comincia a bestemmià
sbraggiand: "La speccia no la ferrovia!"
Ma lu, el brumista, catt, nol se confond!
E, indicand el tramvài, el ghe respond:
"El ved no el sabajon che passa via?!"