On ciffôn

On ciffôn

Vestee, cumò, divan e materass,
me guarden d’alt in bass,
e minga domà quèj, anca la gent,
parland de appartament,
de tutt i robb che occôr in d’una cà,
l’ultim sont mì, el ciffòn, a nominà.
Parland de mì, rescìen tucc el nâs...
perchè, se sà, gh’hoo denter quell tal vâs...
Forsi che in d’ona stanza
el gh’ha minga anca lù la soa importanza?...
Ma in quanto poeu ai ciffôn,
disemm se mì gh’hoo tort o gh’hoo resôn.
A quell che dorma – el sia quell che se sia –
sont forsi minga mì a faggh compagnìa?
La ten la tosettina
in sul sò ciffonin la pigottina; –
ghe porti i medesinn al pöer malaa,
ghe foo come mèj podi d’ospedaa; –
e aranz, marsàla, tant per fall content,
porti al convalescent.
(Parli, s’intend, a nomm di mè fradèj
che in tutt’i stanz de lett pòdov vedèj).
E andemm innanz: pussee che necessari
sont poeu per l’omm d’affari:
presempi el mè padrôn che l’è on banchee,
e no ’l vêd e no ’l pensa che ai danee,
el m’ha miss-sù el teléfono e de bott
el senti a bagolà anca de nott. –
E i donn, èmm minga forsi de cuntàj?
Gh’hann sù milla ranzàj,
el sia d’ona donnetta o nobildonna,
d’ona sciorinna o d’ona bigottonna,
e questa, coi Rosàri e col lumin,
la fà el sò altarìn.
Ma, a proposit de altâr: ven poeu quell dì
che in sul ciffôn se veden a lusì
on para de candil; se vêd on Crocefiss
su on tovajoeu de pizz;
se vêd ’na sparpajada
de fiôr... Quella giornada,
ah, la rìva per tucc, e anca i ciffôn
deventen tucc istess, e l’è pù bôn
nissun de mincionàj, perchè el pâr,
in quell tal dì, anca el ciffôn ’n ’altâr! –