« Sro Morot, en Reims, tre multe rigretas, ke kelka membri di nia Akademio uzas, en texti insertita en nia oficiala organo Progreso, vorti neoficiala (ma, vice sed), e, konseque, absolute [ 299 ]nekomprenebla da l’adepti. Uzar neoficiala vorto devus esar tote interdiktata en Progreso. Adminime, l’inventisti di tala nuvaji enskribez la neoficiala vorti inter parentezi, apud l’oficialai. La kozo esas grava, pro ke akademiani donas tale malbon exemplo, e ke, sequante ta exemplo (e, pro quo ne ?) omna Idisti povas kredar, ke su ipsa povas anke uzar irga vorto, qua plezos a li plu kam l’oficiala. Balde Ido divenus absolute kaosatra e nekomprenebla. Mem se Sro Morot devas, per sa publika protesto, esar malagrabla a kelka samideani (akademiani), sa koncienco impozas ad il la devo lansar ta alarmokrio. » So Morot adjuntas : « Quon dicos nia nuva adepti, kande li vidos en nia oficiala jurnalo vorti o formi, quin li ne povos trovar en nia vortolibri e gramatiki ? E quon ni ipsa dicos a nia dicipli, kande li questionos ni ? Kad li ne povus riprochar, ke ni trompis li ? »